یقین

ماں کبھی اپنے بچے پر ظلم نہیں کرسکتی۔ لیکن ضرورت کے وقت زبردستی پکڑ کر نہلاتی ہے، ہاتھ پاوں پکڑ کر ٹیکہ لگواتی ہے، اور ناک بند کرکے زبردستی حلق میں کڑوی دوائی بھی انڈیل دیتی ہے۔ بچہ چیختا ہے چلاتا ہے لیکن ماں اسکی چیخ و پکار نظر انداز کردیتی ہے۔ اور یہ سب کچھ ماں بچے کی بھلائی میں کرتی ہے۔ ستر ماووں سے زیادہ محبت کرنے والا رب جب زبردستی حلق میں کڑوی دوائی انڈیلتا ہے تو بہتری کیلئے ہی ہوتا ہے بس انسان کو بچے کی طرح اس بات کا ادراک نہیں ہوتا۔ لیکن انسان کا یقین کم سے کم اس بچے جتنا مضبوط ہونا چاہئے جسے ماں گود میں دبوچ لیتی ہے اور جب ڈاکٹر ٹیکہ لگاتا ہے تو درد سے جب چیخ نکلتی ہے تو وہ اسی ماں کو پکارتا ہے جس نے اسے دبوچا ہوتا ہے۔ ہر رنج و الم میں اسی رب کو پکارنا چاہئے۔ بے شک وہ بہتر جانتا ہے۔