mujh se pahle tujhe jis shaKHs ne chaha us ne | Ahmed Faraz

مجھ سے پہلے تجھے جس شخص نے چاہا اس نے شاید اب بھی ترا غم دل سے لگا رکھا ہو ایک بے نام سی امید پہ اب بھی شاید اپنے خوابوں کے جزیروں کو سجا رکھا ہو میں نے مانا کہ وہ بیگانۂ پیمان وفا کھو چکا ہے جو کسی اور کی رعنائی میں شاید اب لوٹ کے آئے نہ تری محفل میں اور کوئی دکھ نہ رلائے تجھے تنہائی میں میں نے مانا کہ شب و روز کے ہنگاموں میں وقت ہر غم کو بھلا دیتا ہے رفتہ رفتہ چاہے امید کی شمعیں ہوں کہ یادوں کے چراغ مستقل بعد بجھا دیتا ہے رفتہ رفتہ پھر بھی ماضی کا خیال آتا ہے گاہے گاہے مدتیں درد کی لو کم تو نہیں کر سکتیں زخم بھر جائیں مگر داغ تو رہ جاتا ہے دوریوں سے کبھی یادیں تو نہیں مر سکتیں یہ بھی ممکن ہے کہ اک دن وہ پشیماں ہو کر تیرے پاس آئے زمانے سے کنارا کر لے تو کہ معصوم بھی ہے زود فراموش بھی ہے اس کی پیماں شکنی کو بھی گوارا کر لے اور میں جس نے تجھے اپنا مسیحا سمجھا ایک زخم اور بھی پہلے کی طرح سہ جاؤں جس پہ پہلے بھی کئی عہد وفا ٹوٹے ہیں اسی دوراہے پہ چپ چاپ کھڑا رہ جاؤں mujh se pahle tujhe jis shaKHs ne chaha us ne shayad ab bhi tera gham dil se laga rakkha ho ek be-nam si ummid pe ab bhi shayad apne KHwabon ke jaziron ko saja rakkha ho main ne mana ki wo begana-e-paiman-e-wafa kho chuka hai jo kisi aur ki ranai mein shayad ab lauT ke aae na teri mahfil mein aur koi dukh na rulae tujhe tanhai mein main ne mana ki shab o roz ke hangamon mein waqt har gham ko bhula deta hai rafta rafta chahe ummid ki shamen hon ki yaadon ke charagh mustaqil boad bujha deta hai rafta rafta phir bhi mazi ka KHayal aata hai gahe-gahe muddaten dard ki lau kam to nahin kar saktin zaKHm bhar jaen magar dagh to rah jata hai duriyon se kabhi yaaden to nahin mar saktin ye bhi mumkin hai ki ek din wo pashiman ho kar tere pas aae zamane se kinara kar le tu ki masum bhi hai zud-faramosh bhi hai us ki paiman-shikani ko bhi gawara kar le aur main jis ne tujhe apna masiha samjha ek zaKHm aur bhi pahle ki tarah sah jaun jis pe pahle bhi kai ahd-e-wafa TuTe hain isi do-rahe pe chup-chap khaDa rah jaun