ab ke barish mein to ye kar-e-ziyan hona hi tha | Mohsin Naqvi

اب کے بارش میں تو یہ کار زیاں ہونا ہی تھا اپنی کچی بستیوں کو بے نشاں ہونا ہی تھا کس کے بس میں تھا ہوا کی وحشتوں کو روکنا برگ گل کو خاک شعلے کو دھواں ہونا ہی تھا جب کوئی سمت سفر طے تھی نہ حد رہ گزر اے مرے رہ رو سفر تو رائیگاں ہونا ہی تھا مجھ کو رکنا تھا اسے جانا تھا اگلے موڑ تک فیصلہ یہ اس کے میرے درمیاں ہونا ہی تھا چاند کو چلنا تھا بہتی سیپیوں کے ساتھ ساتھ معجزہ یہ بھی تہہ آب رواں ہونا ہی تھا میں نئے چہروں پہ کہتا تھا نئی غزلیں سدا میری اس عادت سے اس کو بد گماں ہونا ہی تھا شہر سے باہر کی ویرانی بسانا تھی مجھے اپنی تنہائی پہ کچھ تو مہرباں ہونا ہی تھا اپنی آنکھیں دفن کرنا تھیں غبار خاک میں یہ ستم بھی ہم پہ زیر آسماں ہونا ہی تھا بے صدا بستی کی رسمیں تھیں یہی محسنؔ مرے میں زباں رکھتا تھا مجھ کو بے زباں ہونا ہی تھا ab ke barish mein to ye kar-e-ziyan hona hi tha apni kachchi bastiyon ko be-nishan hona hi tha kis ke bas mein tha hawa ki wahshaton ko rokna barg-e-gul ko KHak shoale ko dhuan hona hi tha jab koi samt-e-safar tai thi na hadd-e-rahguzar ai mere rah-rau safar to raegan hona hi tha mujh ko rukna tha use jaana tha agle moD tak faisla ye us ke mere darmiyan hona hi tha chand ko chalna tha bahti sipiyon ke sath sath moajiza ye bhi tah-e-ab-e-rawan hona hi tha main nae chehron pe kahta tha nai ghazlen sada meri is aadat se us ko bad-guman hona hi tha shahr se bahar ki virani basana thi mujhe apni tanhai pe kuchh to mehrban hona hi tha apni aankhen dafn karna thin ghubar-e-KHak mein ye sitam bhi hum pe zer-e-asman hona hi tha be-sada basti ki rasmen thin yahi 'mohsin' mere main zaban rakhta tha mujh ko be-zaban hona hi tha